政情：王憓諗計改變二胡賣藝形象
二胡係中國人嘅民族音樂，但今時今日好少年輕人學二胡。「二胡王子」香港二胡藝術中心主席王憓（Ray）話，以前街頭賣藝嘅人經常會拉二胡，令到二胡喺中國人心目中形象低落，所以多年來佢一直想提升二胡嘅形象，不時創作貼近流行音樂嘅樂曲，仲與歌星合作開音樂會，無非係想增加二胡嘅時代感。
擬與知念貴明跨界合作
不過，二胡流傳至日本之後，喺日本似乎更加受重視，Ray就有好多學生都係日本人。既然係咁，Ray最近就密謀拍住開日本餐廳嘅好友知念貴明，齊齊推廣二胡文化。知念貴明係中日混血兒，自細喺天津長大，咁啱Ray嘅父親王國潼亦係天津人，難怪Ray笑言同佢好投契。
Ray話，知念貴明喺銅鑼灣開咗間不一樣嘅日本餐廳，志在推廣日本傳統和食文化，同佢推廣二胡文化嘅理念相似，所以兩人正打算進一步跨界合作，希望令更多香港人接觸及欣賞二胡。