政情：戴耀廷未衰夠選委戰嗌公投
佔領中環發起人、港大法律系副教授戴耀廷唔單止喺前年發起持續七十九日佔領行動失敗收場，更加喺立法會選舉時推動「雷動計劃」，令幾位泛民老將選情被拖垮而連任失敗，估唔到佢仍然死心不息。特首選舉委員會（選委會）選舉十二月舉行，傳聞戴耀廷有意出選高等教育界選委，同時提出舉行民間公投，要求非建制選委根據公投結果投票，有人就炮轟此舉會影響泛民部署，唯恐天下不亂。
立法會選舉之後，選委會選戰隨即展開，非建制陣營已經表明希望取得一千二百席選委中呢三百席，增加政治影響力。
密謀出選高等教育界
據了解，從來未選過選委嘅戴耀廷、同另一佔中發起人陳健民希望出選高等教育界，仲喺早前討論高等教育界選舉策略嘅大會上，提出以民間公投方式，讓市民選出心目中嘅特首人選，而自稱為非建制嘅選委，就需要跟隨結果投票，成就一個「民間特首」。
不過，戴耀廷嘅建議並未得到所有與會者同意，有人反問，如果市民傾向支持建制派候選人、甚至乎支持現任特首梁振英，咁非建制選委是否要投票支持梁振英呢？亦有人狠批戴耀廷嘅方法係將事件簡單化處理，違背泛民嘅部署。有與會者仲透露，戴耀廷嘅建議令非建制陣營喺選委會選舉部署上分裂，或者最後會分為多隊出選，影響勝算。
落選議員慘情翻舊帳
新建議被炮轟不特止，落選嘅新民主同盟前議員范國威更向戴耀廷翻舊帳，尋日茶敍時就將自己落選歸咎於有人（界刂）票及戴耀廷推展嘅「雷動計劃」。佢話雷動計劃令佢「中開低收」，告急都冇人信，最終佢不幸落選，反而民調比佢差嘅議員就當選！范國威仲話自己發夢都想有補選，聽落好慘情，戴耀廷認真累人累物。
事實上，非建制陣營搶攻選委會，都係為咗明年三月特首選舉鋪路。不過，泛民內部就特首選舉策略上有好大爭議，有人就認為泛民要派人參選，以爭取喺選舉上嘅話語權；亦都有人認為，過去派人出選效果不大，認為要以手上嘅選委選票「造王」，同未來嘅候選人爭取更大嘅利益。
其實泛民面對成個特首選舉仍然有好多細節要理順，但最重要嘅係要得出共識，否則百幾席話搞公投，百幾席話「造王」，其餘就話要搵個人出嚟選特首，到頭來只係一場鬧劇，真係做鬼都唔靈。