中環出更：綵排宣誓議員問題多多
新一屆立法會議員將於本月十二日大會上宣誓就職，秘書處尋日就為佢哋安排咗場就職宣誓示範簡介會及參觀立法會大樓活動。不過，一班新丁繼續反應冷淡，二十六位新丁中只有十幾人出席，嘗試宣誓嘅更加只得何君堯、周浩鼎及醫學界陳沛然三位。新丁唔綵排宣誓，但就問題多多，一時問宣誓時點「走位」，一時又問能否帶毛公仔去宣誓，似乎想「擦邊球」玩嘢多過真係想宣誓囉！
尋日只有十九位新丁出席宣誓示範簡介會，議員劉小麗、香港眾志羅冠聰、青年新政梁頌恆、民主黨幾隻「乳鴿」許智峯、林卓廷等都冇出席，之後嘅參觀團更只有約十人參加。秘書處簡介完點樣宣誓後，就詢問邊位議員想嘗試宣誓，點知大家反應冷淡，只有何君堯舉手。最後何君堯、周浩鼎及陳沛然先後以基督教同天主教形式綵排宣誓，至於有出席嘅幾位本土自決派就冇參與綵排。
邵家臻問可否拎毛公仔
到發問環節時，大家開始踴躍番少少。民建聯李慧琼就問到議員如果未能完成宣誓會點處理，其黨友張國鈞就好關心正式宣誓當日嘅「走位」問題，而社會福利界邵家臻就問可唔可以帶毛公仔去宣誓。邵家臻就話純粹「問吓啫」，但佢都想帶一啲象徵自己價值觀、同佔領行動相關嘅物品一齊宣誓。熱血公民鄭松泰亦話，想喺誓詞表達「港中區隔」嘅政治理念，但具體形式就未決定喎。
負責簡介嘅立法會助理秘書長衛碧瑤話，議員要依法宣誓後先可以參與會議同表決，但喺誓詞中「加料」係咪違規則不能一概而論。而議員當日會有立法會職員帶領到主席台，所以唔使擔心走錯位，最緊要都係唔好遲到同離開會議廳。至於宣誓可唔可以帶公仔，佢就話議員係唔需要帶任何嘢嘅，但帶物品會否違規就要視乎帶啲乜喇。
卓妮