家陣啲後生仔開口埋口講本土，大大聲話自己係香港人，但香港嘅歷史佢哋又知幾多呢？不如等功夫茶考考大家吖，知唔知屯門呢個名稱係點嚟嘅呢？杯渡路又有乜嘢歷史故事呢？
唔講唔知道，一講嚇一跳，原來屯門遠喺唐代已經係軍事重鎮，有「屯兵之門」嘅意思，而且仲係海上絲綢之路嘅重要港口之一，係外地船隻北上廣州通商嘅必經之地。至於屯門杯渡路嘅歷史可上溯至南北朝，相傳杯渡禪師由中原嚟到屯門青山修道，杯渡路就係以大師法號命名嘅嘞。
所以話啫，香港嘅歷史唔止源遠流長，仲同中國歷史密不可分。不過咁，後生仔唔識一啲都唔出奇，事關教科書根本冇教，教育局仲好做唔做，多年前將中史科由獨立必修科改為合併科，卒之搞到年輕一代對歷史一知半解，唔少人淨係知香港曾經係英國殖民地，對中國人嘅身份認同愈來愈低，家陣仲衰到港獨思潮氾濫成災，你話係咪多得教育局唔少吖？
可能當局都知衰啩，決定修訂初中中史科課程喎，建議增加「香港發展」部分，令學生「古今並重」認識中國歷代發展。教育局局長吳克儉係咁講嘅，新課程旨在令學生明白香港喺國家發展過程中嘅角色，加強對社會及國家嘅歸屬感。為期一個月嘅第一階段諮詢現正展開，預計明年再進行第二階段諮詢，一九年推行新課程。
即係咁，香港作為中國不可分割嘅一部分，香港人了解自己國家同埋本地歷史，根本就係應有之義，過去港英時期為咗方便殖民管治，先至刻意淡化歷史科啫，回歸已經十九年，早就應該撥亂反正嘞。之不過講係咁講啦，家陣社會高度政治化，弱勢政府寸步難行，幾好嘅政策都有機會走樣變形，成為反對派搞事嘅藉口。尤其負責推銷嘅係吳得掂局長，佢老哥睇紅葉做導遊就叻，講歷史喎，隨時都係得半桶水嘅咋。
唔係講笑呀，已經有人批評新修訂嘅中史科係國民教育嘅借屍還魂，無非想洗學生嘅腦，為政治服務。仲有呀，有教師擔心新增課程太多，授課時間太少，「古今並重」變成唔湯唔水，弄巧成拙，要求延長諮詢時間。大家睇到喇，第一階段諮詢已經爭議多多，落實建議嘅阻力都咪話唔大。
正如古人話齋，以史為鏡，可以知興替。一個對歷史一無所知嘅民族，唔止冇進步，直情係悲哀，所以學習歷史唔止係好事，仲係必須做嘅事。家陣冇嘢驚，最驚港府「推出一項跪低一項」，今次會唔會又歷史重演，真係要睇過至知咯。