梁振英雖然仍未表態是否競逐連任，不過以做CY粉絲為榮嘅人已經忍唔住撲出嚟搖旗吶喊，不理好醜，一注押下去，讚咗先算！有論者指出，支持CY連任的都是一些公眾緣欠佳嘅忠實「梁粉」，最後能否令CY扳回民望、說服北京支持他連任，難度看來甚高。
當然，世事無絕對，CY最愛「迎難而上」，而且曾經創造歷史，但今次是否又咁好彩，好快就會揭盅。之不過，CY忽然感性，突然關心劏房基層嘅苦況，情節來得太突兀，佢自己谷淚哽咽入戲，觀者感覺未必良好也。講真，撲出嚟為佢叫好者吹到離晒譜，難免荒腔走板，像老董狂讚CY創科緊跟內地，必令香港創科大有可為。眾所周知，香港幾經辛苦才成立創科局，剛起步，企都未企穩，又點緊跟內地？看來應該是緊跟內地食塵，深圳之創新及科技已拋甩香港九條街。咪以為創科局局長楊偉雄真係見過喬布斯，就可化身名駒「巴基之星」──輸在起跑線，贏在終點線！
有人更吹噓CY在四大目標：房屋、安老、扶貧、環保都有實際成績，讚他有「鋼鐵的意志」。然而，老朽只知道劏房居住環境惡劣，工廈劏房愈劏愈有，租金愈劏愈升，而公屋輪候時間愈等愈長，由大約三年升至四年甚至唔知幾多年，公屋輪候冊急升至逾三十萬！
見微知著，其餘安老、扶貧、環保，無一有可以歌功頌德者，凡我讀者，多點留意本報的「正論」及「功夫茶」，當可見今屆政府有幾廢！CY的管治能力實在太差勁，民意一再尋底，在中央心目中如何會有認受性？賈誼《治安策》說：「聽言之道，必以其事觀之，則言者莫敢妄言。」意思是聽取意見的方法，必須以事實考察它是否真實，那麼提意見的人就不敢胡言亂語了。當然，妄言也許出於博一博，這注押下去，說不定又是挺得快好世界。