呢幾年勞工界同商界就取消強積金對沖嘅問題角力，但仍然處於膠着狀態。眼見呢屆政府只剩番大半年任期，隨時又石沉大海，工聯會尋日索性踩上特首辦搵梁振英（CY）「追數」，要求取消對沖機制，以免繼續蠶食市民嘅退休保障，面對對方來勢洶洶，CY就承諾會喺現屆政府解決。依家CY落咗柯打，工聯會實咬住勞工及福利局局長張建宗唔放，加上立法會已換屆，要求政府交出方案，睇嚟張建宗都唔使旨意再側側膊，拖得就拖喇！
