政情：大舊從政三十一年笑說選舉贏足十七場
人民力量立法會議員陳偉業（大舊）今日過後，就結束三十一年政治生涯。大舊話，多年嚟最難忘都係一九八五年首次參加選舉，仲高票當選成為荃灣區議員，開始幾十年嘅議員生涯。講起自己過去多年贏過十七場區議會同立法會選舉，大舊就眉開眼笑，仲話「次次選舉最開心，贏咗十七次，冇人多得過我！」佢又告誡從政人一定要落區同做政策研究，唔好只係「網上稱王」。
無心插柳 高票當選
即將卸任，大舊尋日喺立法會議員辦公室收拾細軟，佢拎住一幅由調景嶺原居民送畀佢嘅牌匾，話係最有紀念價值，但塊牌匾有一半被太陽曬到褪色，佢話會搬番屋企好好保存。提到喺政圈打滾咁多年，大舊話最難忘係第一次參選區議會，佢原本只係幫朋友助選，點知朋友突然棄選，佢代為上陣，估唔到咁就開始咗議員生涯。佢仲話，自己經歷咁多場選舉，除咗今年幫人「抬轎」，只係一一年區議會選舉輸過。
自言十七歲投身社會工作嘅大舊就話，未來一年都係同太太去旅行，而太太亦已經辭職，提早退休陪佢。不過，大舊就話，自己四十幾年冇停過，唔知會唔會唔習慣，但點都會休息一年先決定係咪真退休。