中環出更:羅詠詩靚囝囝 英國會考做狀元

香港青年聯會日前舉辦第二十四屆會慶及會董會就職禮,好多會董同成員一早就到場,卓妮見司庫周沁同參事羅詠詩(Anthea)及常董林淑怡等聚埋一齊講到興高采烈,咁興奮唔知講咩呢?原來大家恭喜Anthea嘅囝囝早前喺英國會考課程GCSE中取得十一科A*狀元成績,難怪Anthea咁開心啦!

話說英國約七十萬名考生入面,要頭百分之三至五先可以攞到A*成績,仲要科科都攞到A*絕對唔容易,而Anthea囝囝唔單止讀書成績一流,周沁仲大爆Anthea個仔樣貌似足韓星「都敏俊」咁,真係又叻又睇得。阿仔成績咁出眾,Anthea就話囝囝仲未揀定讀咩科,但應該唔會讀醫,因為自覺唔夠細心,其實咁高分讀咩都得啦。

吳傑莊推動四地青年交流

講番當晚就職禮,主席吳傑莊與首席參事范駿華、顧問霍啟剛及葉振都齊齊表演打鼓,氣氛高漲。吳傑莊話,青聯將繼續推動青年發展工作,除咗年初嘅哈爾濱五日四夜冰雪體驗之旅及暑期實習計劃外,仲有一連串活動促進兩岸四地青年間嘅互相交流同合作。

同場仲有副主席黃永光、郭基煇、朱鼎耀、常務副秘書長何廸夫等。

霍啟剛講起早前日本東京地震時,佢都喺當地,喺酒店房內感到震動後初時大為震驚,急急腳同其他旅客一齊迅速由樓梯行落酒店大堂,但發現焦急嘅都係外國人,仲見到大堂有好多當地人非常淡定咁歎咖啡,即時令佢個心定一定,亦慶幸未受影響。

卓妮

第一手消息請下載on.cc東網iPhone/iPad/Android/Windows Phone Apps