有人話，往事只能回味，計功夫茶話齋，往事不堪回首就真。呢，尋日係佔領之亂兩周年，呢場鬧劇除咗搞到香港雞毛鴨血，仲留低唔少蘇州屎，淨係一班佔領搞手及幕後黑手至今逍遙法外，已經令香港法治招牌蒙污喇。
講起就把幾火，長達七十九日嘅佔領鬧劇唔止損害經濟民生，仲好似打開潘朵拉魔盒咁，成為所有政治亂象之源，家陣港獨勢力猖獗，代理人仲登堂入室成為立法會議員，咪就係脫胎自佔領之亂囉。尋日又有團體喺金鐘為佔領「招魂」，魔鬼山再現「我要真普選」直幡，簡直死唔斷氣，煩不勝煩。
搞成咁，真係多得港府唔少。大家有眼見，「警方捉人，司法放人」呢一幕不斷重複上演，當局話就話喺佔領期間拘捕近千人，但真正完成法律程序兼被定罪嘅只有一百二十三人咁大把，而且大部分都係輕判；至於被預約拘捕嘅四十多名搞手級人馬，直情一個都冇被起訴，仲話香港係法治之區喎，都唔怕笑大人個口嘅。
違法毫無成本，咁就唔怪得一班牛鬼蛇神有恃無恐嘞。好似佔領搞手之一嘅陳健民咁吖，日前就大講風涼話，話自己一早就被預約拘捕，點知等極都等唔到被起訴，仲話唔排除當局拖延檢控有政治考慮，可能係特首博取連任嘅籌碼。至於有份捲入黑金醜聞嘅李卓人就仲寸，話政府擺明做騷，實質無心執法，事關律政司根本唔夠料砌佢哋。
大家睇到喇，佔領搞手咁囂張，咪就係睇死港府係隻冇牙老虎囉。佔領搞手及黑手好似有「免死金牌」咁，一個二個寸到飛起，政治主教揚言為自己至今逍遙法外而「羞愧」，直言法律面前人人不平等；而佔領搞手兼金主嘅壹傳媒老闆黎智英就揚言唔怕坐監，最怕判佢洗廁所喎，擺明嘲笑港府無能，冇佢哋符啫。前排漢奸黎仲衰到夥同另一搞手戴耀廷操縱立法會選舉，唯恐天下不亂，咪就係拜當局放虎歸山所賜囉。
最荒謬嘅係，港府唔止老虎屁股唔敢摸，就連老鼠屁股都一樣唔敢摸。好似三名「雙學」領袖咁，早前被法庭輕判放生，就算律政司要求覆檢都被駁回。講到底，呢班人唔係乜嘢善男信女，係人都知漢奸黎同美國勢力過從甚密，佢嘅助手就係美國前軍方情報人員，而幾個後生仔更加「青出於藍」，其中一個仲被外媒捧為「大思想家」添，港府唔敢得罪外部勢力，投鼠忌器咯喎，咪惟有一拖再拖，不了了之囉。
都係前人講得啱，福禍無門，唯人自招。香港之所以妖孽為患，百病叢生，福地淪為亂地，歸根究柢係港府姑息養奸所致！