增副手位育接班人
據了解，整個架構重組會將現有嘅五個政策支部，改為地區發展、黨務發展、政策倡議三個支部，同時增設副秘書長一職。有公文袋中人就爆料，指秘書長賴仁彪已經做咗三屆，每一次都因為苦無接班人而要連任，長遠要解決問題，所以就建議增加副秘書長一職，一來分擔職務，同時可以培養新人接任秘書長，至於副秘書長由邊個出任，暫時仍毫無頭緒。
賴仁彪承認唔想再連任，但今次改革並唔係單係為佢而設，而係公文袋踏入十周年，希望檢討架構，以回應公文袋革新口號。佢又話成個改革會增加民選執委成分，同時每個執委都會有更清晰嘅負責範疇，加強功能，改善一直以來嘅問題。