政情：葉劉考慮選特首自稱唔識陪跑
特首選舉下年三月舉行，新民黨主席葉劉淑儀尋日喺電台節目話，梁振英（CY）作為現任特首，如果競逐連任會有優勢，認為CY係「一號種子」。被問及會否積極考慮參選，葉劉就話「我考慮好多嘢，點只呢樣？」又話全港關注嘅大事，無理由唔考慮。對於「陪跑」說法，佢話：「我從來都未試過陪跑，我唔識陪跑」。
料有人已暗中準備參選
葉劉話，CY對自己仍然很有信心，「佢一定會爭取（連任）」，又話CY係「一號種子」，認為在位者一定有方法向一千二百名選委拉票，亦可能已掌握到幾多票在手。葉劉又認為兩位司長有機會參選，因距離特首位置只有一步之遙，但特首與司長互相競爭機會不大，「司長出來都好尷尬，你點樣攻擊你老闆？佢做土地唔好你有份喎」，但佢係行政會議成員就「無咁尷尬」，因只喺顧問角色。
被問及至今仍未有人表態參選會否好奇怪，葉劉就話，每個人需要準備嘅時間都唔同，但如果係現任官員，就應該要辭職，又認為各人應考慮有幾大決心及要多少時間準備，佢亦估計或者有人已暗中準備，但準備工作冇立法會選舉咁大型。