經歷過區議會選舉及立法會選舉後，本港下年又到特首選舉，通常喺選戰前半年都係敏感時刻，又係「牛鬼蛇神」出沒嘅時候。
香港末代港督彭定康（肥彭）獲邀喺十一月底來港出席一個論壇，題為「香港管治：禮崩樂壞？」，喺呢個敏感時刻來港發表管治偉論，都唔慌有咩好嘢講喇，話唔定又係唱衰現屆政府，難免影響特首選舉。
有關論壇由公民實踐培育基金主辦，於十一月二十六日於亞洲協會舉行，邀請咗肥彭、立法會前主席曾鈺成、GEMS Limited非執行主席兼長江實業地產獨立非執行董事馬世民及港大校長馬斐森，談論公共管治、企業管治和大學管治之道。
主辦單位喺簡介中提到，香港回歸近二十年，各方面管治質素每況愈下，缺乏認受性的政府於施政一籌莫展，立法會因制度缺陷而淪為政治衝突場所，自由、廉潔、法治今非昔比，希望以此論壇全方位討論管治問題及理念。未討論就已經好似有咗結論咁，到時啲嘉賓會講啲咩呢？相信大家都應該估到。