政情：新丁議員懶散卿姐開拖

進行句鐘後 多人借尿遁

簡介會原定朝早九點開始，但因為二十六位新丁中出席嘅寥寥可數，直至九時十五分左右，先得十五人，最終勉強「開波」影大合照。民建聯（民記）張國鈞、劉國勳及民主黨鄺俊宇，影完大合照先姍姍來遲。張國鈞同劉國勳一個話要喺大樓處理行政事務，一個就賴塞車。家住天水圍嘅鄺俊宇就聲稱自己準時到，只係因為要辦理候任議員證及職員帶錯路，先搞到趕唔切影大合照喎。

遲大到嘅仲有疑被恐嚇嘅朱凱廸及香港眾志羅冠聰，朱凱廸仲要逗留咗約一小時就提早離開。不過，朱凱廸都留得耐過影完大合照就「快閃」嘅新民黨容海恩，以及完全冇出現過嘅青年新政游蕙禎。

可能班新丁仲未習慣長時間開會，簡介會開咗大約一小時，已有唔少人要借尿遁，或到會議室外講電話、抖抖氣，其中社會福利界候任議員邵家臻更坦言頂唔順，要出會議室散步。其實秘書處已喺上午三個幾鐘會議期間，分別安排咗小息同茶點享用時間，如果咁都頂唔順，又點坐四年呢？

撞正非建制派首次開會

直到下午，簡介會安排咗即將卸任嘅卿姐及民記葉國謙同新丁分享心得，不過因為撞正非建制派平台首次開會，結果只有八名建制派新丁出席，而朱凱廸、劉小麗、姚松炎、羅冠聰、邵家臻、梁頌恆及陸頌雄唔見影，就連民主黨尹兆堅、林卓廷及鄺俊宇唔係缺席就係遲大到，搞到卿姐嬲嬲豬。

卿姐就喺會上大鬧缺席簡介會嘅新丁：「報咗名又唔嚟，真係唔知咩人嚟，真係好有問題囉！」佢仲寄語新丁開會唔可以遲到早退，要睇晒文件先開會。阿謙亦提醒新丁要熟習議會運作及《議事規則》，但班新丁聽唔聽得入耳就唔知喇。