中環出更：爭做立會主席田北辰：我唔係善男信女
新一屆立法會下月開鑼，主席之爭亦展開。非建制派平台尋日首次開會，擔任平台召集人嘅民主黨涂謹申（阿涂）會後表明會參選立法會主席，同盛傳參選嘅現屆內務委員會主席梁君彥一較高下。不過，新民黨田北辰（田二少）尋日亦都公開表明有意競逐主席一職，依家已有足夠提名，仲話自己都係作風強硬，唔係善男信女，仲話梁君彥最大問題係為功能界別議員，暗指不夠認受性。
阿涂宣布角逐
現時建制派內有意爭主席嘅有梁君彥、謝偉俊及田二少，三人爭位，難免令人感覺建制派內訌，田二少就叫建制派搞初選。不過，建制派內部係咪咁民主呢，真係唔使多講喇，最後肯定歸隊，集中票源選一個人做主席。
建制派為爭主席內訌外，非建制亦想分一杯羹，除咗阿涂要角逐主席一職，公民黨郭榮鏗及會計界梁繼昌都分別揚言要參選，前者參選內會正、副主席、後者就爭財務委員會正、副主席位。佢哋都話會爭取平台內二十七人支持，即未計冇出席平台會議嘅熱血公民鄭松泰及青年新政梁頌恆、游蕙禎。不過，非建制派尋日傾咗個多小時，連平台名稱都未諗到，真係幾多大計都出師無「名」喇。
卓妮