中環出更：港大頒院士舊生緬懷求學生涯
香港大學尋日舉行頒授典禮，向五位傑出人士頒授名譽大學院士，講到大學生活，獲頒名銜嘅創興銀行副主席兼董事總經理梁高美懿就話，最懷念港大嘅荷花池，皆因以前溫書、傾偈、休息咩都喺晒嗰度，可以話陪住佢幾年大學成長生涯。
另一獲頒名銜嘅港鐵主席馬時亨（肥亨）就憶述，當年佢都係入住港大宿舍，但就唔會玩得好癲，反而好鍾意去食消夜喎！
肥亨難忘水街食消夜
講起大學最難忘回憶，肥亨笑言以前搵食艱難，印象最深刻就係佢由港大搭車去佐敦教書賺錢，要先搭巴士落中環再轉船，來回港大及佐敦接近四小時，但為咗賺外快冇計啦，而夜晚就梗係唔少得消夜，水街附近就有好多糖水同小食，識晒窿路。
講到大學生活不得不提迎新Ocamp及住hall經歷，同樣獲頒名銜嘅經綸慈善基金董事黃啟民就慶幸當年住hall已經係大學三年級，所以一入去就已經係「大仙」，避過被人玩之餘，自己亦冇留難人，事關佢都要識晒其他「大仙」，好在後生記性好，認百幾人都唔係好困難，話大家都係志在快啲識人同熟落，至今諗番都係好開心。
尋日肥亨獲家人出動撐場，其中細女馬露玲更腹大便便現身，話肚內小朋友係囡囡嚟，仲隨時出得世添！即係話啱啱三個幾月前首嘗抱孫仔嘅肥亨，好快可以左擁右抱，左一個孫仔，右一個孫女，湊成個好字喇！馬露玲仲話，女兒出世後可以同家姐馬露明個囝囝一齊玩，有伴唔怕寂寞！
卓妮