築室道謀，三年不成。港府成日話要開發旅遊資源，淨係一個大嶼山，一時打造商業購物城，一時發展水療度假村，口號一個比一個動聽，結果都係得個講字。嚟緊大澳又話要發展成為康樂及旅遊點，會唔會又係煲冇米粥，真係冇人話得埋。
根據大嶼山發展諮詢委員會年底出爐嘅發展藍圖，大澳將會發展水上樂園、戶外活動設施、觀星點以及鄉郊生活體驗等十多個景點，仲會利用大澳棚屋、紅樹林及廢棄鹽田等特色，發展鄉郊生活體驗、民宿、觀賞日落景色場地。嗱，聽落就幾吸引嘞，實際做唔做到，又係另一回事。正如委員會主席哈永安提醒，當局落實發展大澳前，一定要先評估地區承載能力，如果唔係出現塞爆情況，分分鐘弄巧成拙。
大澳交通配套有幾差？不妨聽吓街坊點講。當地每逢假日一定逼到冚，特別係中秋、端午等大時大節，人流高度集中，遊客同村民爭巴士坐，郁吓都要等幾粒鐘至上到車。冇事冇幹已經咁誇張，打風落雨情況更加不堪設想，幾年前一場黑雨搞到大澳斷水斷電，淪為與世隔絕嘅災區，就係最經典例子嘞。
最離譜嘅係，當局拍拍腦袋話要發展大澳，對居民改善交通配套嘅訴求闊佬懶理，關人個關，明明來往大澳至東涌嘅渡輪服務需求，近五年來幾乎翻咗一番，叫佢起條連接兩地嘅沿海公路咩，當局居然借咗聾耳陳隻耳；好嘞，咁為大澳村民設立優先座又有冇得諗？唔好意思，運輸署話喎，公共交通工具一向都係根據乘客輪候次序接載乘客，唔該你哋慢慢排隊啦！
講真，「行路難」係大嶼山居民面對嘅共同問題，係人都知，當地路窄多彎，過去一直限制外來車輛進入，點知當局早排失驚無神開放自駕遊，大量車輛喺節假日湧入，搞到險象環生，居民忍無可忍下一度堵路抗議，可想而知情況有幾嚴重。
即係咁，大澳旅遊自然資源得天獨厚，發展潛力不可謂不大，但點都要配套跟得上至得，否則好似長洲咁樣，次次公眾假期都人滿為患，仲逼過旺角，甚至有當地居民埋怨遊客「佔領長洲」，結果咪搞到七國咁亂囉。
冇計喇，港產官僚就係咁嘅嘞，眼高手低，任何好事落喺佢哋手都有本事變成壞事。發展旅遊添煩添亂，發展醫療產業引發雙非問題，個人遊本來為香港帶嚟經濟收益，結果又觸發中港矛盾……類似例子數到天光都數唔晒，官老爺化神奇為腐朽，市民真係多得佢哋唔少！