政情：初出茅廬好老積郭偉強逆齡變後生
立法會同區議會事務一向好困身，雙料議員未必夠時間休息，隨時捱到殘。不過，成功轉戰直選嘅工聯會郭偉強就似乎同其他人唔同，就算依家要湊埋個BB，但佢個樣好似愈來愈後生，就連佢啲助理都好認同。郭偉強話，睇番以前啲相，助理話佢○三年初出茅廬出戰東區區議會選舉時個樣比較「老積」，依家反而睇落後生咗好多。
慳家淘寶買衫
睇番當年郭偉強嘅衣着打扮，一身恤衫西褲再打埋呔，加埋副幼框眼鏡同髮型，雖然形象斯文，但實在太過成熟喇。依家嘅佢除咗副眼鏡，剪番個年輕啲嘅髮型，明顯比當年後生好多。其實佢幾個月前已改造形象，經常蠟晒頭，衣着亦比以前鮮艷。不過，咪以為轉造型使費好貴，但原來佢係幫襯淘寶買衫，認真慳家。
郭偉強坦言，網上買衫尺寸好難預計，都係靠彩數，平均買三件都有兩件係啱身。咁嘅命中率都算高，全賴佢太太經常拎住把軟尺通屋走幫手度尺寸，難怪佢都大嘆度尺係「女士嘅獨特技能」喇！