政情：泛民老將賴地硬落敗多藉口
今屆立法會選舉多名泛民主派老將落敗，包括轉戰新界西直選的民協超級議員馮檢基（阿基）、分別喺香港島及新界西角逐連任嘅工黨何秀蘭（Cyd）及李卓人（阿人）。對於敗選，佢哋就藉口多多，特別係阿基，一時話新界西票王朱凱廸吸晒票源，一時又話如果自己再出戰九龍西直選就會畀人鬧，所以先轉區參選。其實阿基空降新界西先係分薄其他泛民候選人嘅票源，真係輸咗仲要賴地硬！
阿基尋日喺電台節目被問到落敗原因，佢話民協喺新界西有支部，加上佢估計自己知名度高，上屆選舉民主黨加公民黨都攞到十四萬票，所以就覺得泛民可以攞多一個議席。不過，因為分票分得差，支持泛民嘅選民又覺得一定唔可以畀建制派候選人入議會，要保送多一個非建制派，結果就投咗畀啲後生仔。以九龍西深水埗為老巢嘅阿基又話，如果今次喺九龍西出選會被人鬧，所以先至轉區參選。不過，阿基轉區分薄泛民票源，都係一樣被人鬧啦！
離地怪選民不重質
至於Cyd，佢話自己敗選係因為過去主要做議會文件、政策研究、同志工作，多過去同街坊接觸，而選舉期間佢唔係推薦名單會「比較弊」，加上又有消息傳佢停止選舉工程及輸梗，呢啲都會有影響。佢仲反問，大家一直想香港島搵多兩個泛民入議會，「但搵嘅時候係睇數量定質量呢？」估唔到佢工作「離地」而敗選，竟然唔反省，反而暗踩選民只重數量而唔睇質素，相信冇投票畀佢嘅選民，肯定覺得自己嘅投票決定非常正確。
靠食老本 早被厭棄
而自稱九五年至今任職議員二十年嘅阿人，今次都被連根拔起。雖然阿人承認自己做得唔夠好、要反思，但轉頭又話依家配票已經蓋過候選人嘅往績同立場嘅考慮，佢擺太多時間喺佔領行動等政治運動中，少咗時間放喺選區。如果好似佢咁講，主打政治議員嘅香港眾志候任立法會議員羅冠聰、熱血公民鄭松泰等人就唔會跑出啦！一班泛民老將多年來靠食老本，選民早已厭棄，依家仲喺度賴呢樣賴嗰樣，睇嚟佢哋真係唔知個醜字點寫。