有人話，下水道係一個城市嘅良心。計功夫茶話齋，一個城市有冇良心，點止睇地下水道，地下水管一樣咁重要。照咁睇，香港肯定係一個冇良心嘅城市，水務署更加係最冇良心嘅政府部門添。
大家有眼見，水務署保養水管不力，搞到水管日爆夜爆，左爆右爆，一年爆足二、三百次閒閒哋。呢，尋日清晨之嘛，葵涌廣場對開路面又嚟料嘞，仲衰到鹹淡水管打孖爆，大量黃泥水夾雜沙石湧出路面，變成澤國之餘，仲搞到交通嚴重受阻，巴士及小巴需要改道，打工仔同學生哥裙甩褲甩遲大到，真係多得水務署唔少。最慘係附近食肆打開門做唔到生意，有酒樓計過損失足足十萬元，唔肉痛就假。
唔使審都知，今次水管爆裂，又係水管老化惹的禍。水務署話喎，已即時進行緊急維修，並向居民提供臨時食水，直至傍晚大致完成搶修工作。即係話，咁樣爆一爆就搞足十八小時，呢啲唔係擾民係乜吖？商戶嘅損失又可以向邊個追討吖？最離譜嘅係，今次已經係葵涌區今年第五爆，如果計埋其他地區，更加多到數唔晒。淨係前兩日咋，屯門恒福商場對開路面鹹水管突然爆裂，搞到郵袋櫃都幾乎浸沒；至於最誇張就梗係前排連內地輸港東江水管都爆埋，東鐵服務仲受阻逾四小時添，旅客怨聲載道，簡直靠害。
開講有話水為財，水管爆完又爆，馬路噴泉通街都係，等於倒錢落鹹水海。有數得計，水務署開支由二十年前嘅四十五億元大幅飆升至舊年嘅八十多億元，幾乎翻咗一番咁滯，單係爆水管已經導致每年最少損失二億立方米珍貴食水，佔總供水量兩成，足以注滿四十七萬個標準泳池，涉及金額係七億大元。難為水務署仲好意思叫人珍惜食水喎，最敗家咪就係佢哋囉。
可能有人會問，水務署十幾年前已經展開更換及修復水管計劃，仲話有關計劃去年底已大致完成，因乜解究水管仲係爆到七彩o架？答案一字咁淺，廢囉！無能囉！水務署施工慢如蝸牛，好多當初未被列入復修計劃嘅水管，喺呢十幾年間已經老化，結果補完東牆，又到西牆出事。水務署自己都承認，一四年九月至一六年一月，九十八宗食水管爆裂事故之中，有十五宗涉及已使用年期少於三十年嘅水管，當中一宗仲係已更換及修復嘅水管添，問你服未。
所以話啫，港府點止「冇神經、冇知覺、冇靈魂」，更加「冇良心」。見微知著，連保養水管咁簡單嘅事都搞到一塌糊塗，仲想旨意港府搞好政治經濟民生喎，真係發夢都冇咁早咯。