政情：陳雲 中出羊子淡出網絡
被港獨人士稱為「國師」嘅本土派學者、「熱普城」立會新界東參選人陳雲，最終喺選舉中慘敗，而其徒弟中出羊子，早前亦因主張推動香港成為擁有完整主權嘅民主國家，結果被取消參選立法會資格。選舉過後，兩師徒今日均喺facebook發貼話，將會淡出網絡世界，莫非兩人對政途已經意興闌珊？
一個專心寫作 一個搞小生意
當中「國師」嘅貼文提到，其《本土論壇》會終止，僅有嘅兩個網媒專欄都會喺合約結束後終止。佢話：「往後，只有我喜歡的人，才會在現場見到我。網上的我將會逐步消失，直至寂滅，包括這個我用了多年的面書戶口，將在適當時候終止。」
但「國師」之後又再發新貼文，指自己由前日開始靜心寫作《香港文化政策》下卷，仲話一段時間之後會恢復網台節目，深刻談論香港文化、華夏天下，而喺網台節目之前，亦會舉辦啲小規模嘅聚會同講座。至於中出羊子就話無法接受今次選舉結果，會慢慢淡出搞自己嘅網絡安全小生意。