政情：劉小麗減教務迎戰議會
人稱「小麗老師」嘅香港專上學院社會科學系講師劉小麗，破天荒喺立法會九龍西直選取得一席，早前佢喺論壇承諾唔會做全職議員，但尋日就有學生爆料，話佢已經放棄教席，將本來安排由佢任教嘅科目全部推畀其他人。小麗老師接受查詢時則否認事件。
話會捐出一半議員酬金
尋日早上有自稱係劉小麗學生嘅網民喺網上貼文，指小麗老師尋日並冇出席自己任職科主任嘅課堂，又將任教嘅課堂改由姓朱嘅老師代教，質疑小麗老師違反早前唔想做全職議員嘅說法。不過，小麗老師否認事件，指自己於選舉前已經與校方商量好，若當選就會減少一半課堂，目前一星期會教六小時課，強調並冇放棄教學。
小麗老師又話，未來喺議會上會專注全民退休保障及墟市政策，唔排除同其他自決派及政黨合作。至於佢喺競選時承諾當選會將一半議員酬金捐出成立一個基金，用於組織家務義工隊幫助長者，依家佢會兌現承諾，仲話基金歡迎其他非牟利機構申請項目，為長者服務。