政情：房策遺禍曾蔭權認衰唔認錯
本港私人及公營房屋的供求嚴重失衡，導致樓價高企，上車艱難，甚至公屋三年「上樓」落空，民怨沸騰，歸根究柢是上屆政府停止定期賣地及停建居屋所致。前特首曾蔭權爵士在卸任四年後接受報章訪問時終於認衰，但就不肯認錯，指事後回想當年應該繼續開發新土地，更為自己辯護指「真係好艱難搵新地」。談及摯友、前政務司司長許仕仁現時身陷牢獄，曾蔭權表明現時每日都會為對方祈禱。
現屆政府強調施政當中房屋政策是「重中之重」，為了覓地建屋，被地區人士炮轟「盲搶地」、發展新界東北又受到環保人士強烈反對，更掀起多場抗爭及大型示威，縱使政府多番推出辣招及出口術壓抑樓價，以減低市民買樓意欲，同時又增建公屋居屋，但遠水不能救近火，樓價未見回落，基層市民苦不堪言。
事後孔明 講乜都得
曾蔭權被指是造成房屋困局的罪魁禍首，但他在訪問中仍然不肯認錯，還指九九年亞洲金融風暴後，香港面臨困境，當時房地產特別是中型住宅樓價下跌六至七成，五百萬元的單位狂跌至二百萬元，「啲人好驚，如果房地產仲係猛谷拍（賣）地出去，都唔知會變咗咩樣，當時市民亦唔會支持。」
他又指政府當時為挽救樓市而施「重藥」，包括停止定期賣地及停建居屋，但當時並非完全不供應土地，只是改用勾地制度，並認為這種方法準確，但他事後回想，坦言每個政策都可以做得更好，就係冇積極開發新嘅地皮。俗語話「有早知，冇乞兒」，曾蔭權咁講，依家都變咗廢話啦！
雖然他終於認衰，但旋即又為自己辯護，話睇番轉頭，每年公營、私營房屋至今嘅出產量都唔係相差好多。他又認為問題最大樽頸在於土地開發，但是當時移山填海又唔准，樓宇加高同增加密度又唔得，所以開發新土地好艱難。
「每日幫許仕仁祈禱」
訪問中又提及前政務司司長許仕仁因公職人員行為失當及其他控罪罪成，被判囚七年半，與許仕仁相交多年的曾蔭權亦有撰寫求情信。
面對已成階下囚的摯友，曾蔭權語帶哽咽，自言為對方做了頗例外的事情，「當時陪審團判佢（許仕仁）有罪時，我寫咗封信畀法官，封信講出我所有內心對呢位老朋友嘅心境。」曾蔭權仲話：「我依家只有每日都為佢祈禱，我覺得佢都係我終身一個好好嘅朋友。」