中環出更：郭晶晶 李雲迪膺傑出新港青
香港近年引入唔少內地青年精英，佢哋各自發揮所長，不斷提升香港競爭力，正如「跳水公主」郭晶晶同「鋼琴王子」李雲迪等，日前就獲頒「十大傑出新香港青年」，以表揚佢哋對香港嘅貢獻。唔講唔知，原來「體操王子」、中國運動員教育基金會創始人李寧仲係郭晶晶嘅推薦人添！
《2016十大傑出新香港青年》頒獎禮前晚假灣仔會展舉行，呢個頒獎禮係表彰內地來港嘅新香港青年喺金融、地產、建築、工程、文化等方面嘅成就及為香港繁榮穩定作出貢獻。身兼港協暨奧委會副會長霍啟剛喺完成里約奧運之旅後，當晚都陪太太晶晶去領獎，晶晶喺接受獎座後話：「對我來說，是一個很高的榮譽。我希望運用自己體育的專長，為大家出一分力。」
晶晶獲「體操王子」推薦
原來李雲迪啱啱完成咗西藏公益之行，喺海拔五千三百七十三米嘅普瑪江塘小學捐咗個音樂教室，難怪佢喺領獎後話：「我會一直致力於音樂的傳播與交流，為文化繁榮作出貢獻。」而啟剛同晶晶難得與李雲迪相遇，雞啄唔斷，當然唔少得影番張合照啦！
其實晶晶來港後都有唔少公職，難怪李寧喺推薦信都話若果晶晶獲選，定可激發晶晶同更多新香港青年喺香港及內地發展交流中發揮更積極作用。啟剛係香港菁英會嘅榮譽主席，致力做青年工作，太太膺「傑出新香港青年」當然好開心，當晚班菁英會兄弟好似主席盧金榮同副主席甄韋喬等都嚟撐場。盧金榮大讚晶晶平日好勤力，可能係運動訓練嘅緣故，從未見晶晶抱怨任何事，仲覺得佢特別正面添！
卓妮