前幾年有學者統計元明清三代科舉考試中舉名單，發覺李氏歷久不衰，長期佔據高官排行榜首，但講到香港官場咯喎，唔使問阿貴，最大姓非賴氏莫屬，好似商務及經濟發展局局長蘇錦樑咁，直頭應該改名做「賴錦樑」！
話說訪港旅客數字跌跌不休，雖然七月份略為喘定，但八月埋單計數幾乎肯定繼續尋底，蘇錦樑尋日解畫，除咗經濟大環境影響、周邊貨幣轉變呢啲例牌菜之外，仲話最近天氣惡劣影響旅客訪港意欲。至於點樣救亡，佢老哥就話會舉辦多啲大型活動，吸引旅客同市民參與喎。
嗱，呢啲咪怨天尤人囉！查實比起好多地方嚟講，香港氣候算係溫和，而且旅客行程多數一早安排好晒，有幾個會因為打風落雨取消吖。再講，香港年年七、八月都係颱風季節，點解以前好地地，唯獨今年旅客減少，擺明就係冇嘢賴搵嘢嚟賴喇。
歌仔都有得唱︰「三分天注定，七分靠打拚。」係人都知，國產土豪近年成為各地趨之若鶩嘅財神，香港背靠內地，本來近水樓台，得天獨厚，弊在自己唔爭氣，中港矛盾日益尖銳，有啲人唔係驅蝗就係光復，係人都避而遠之，偏偏港府姑息養奸，唔敢執法，旅客過門不入，純屬咎由自取。最慘係啲嘢賣得愈來愈貴，服務態度愈來愈差，加上景點十年如一日，搵咩吸引旅客吖。
講真，佢老哥賴天氣唔係話唔得，問題係令旅客敗興而回，打風落雨只係小兒科，空氣污濁至係大問題，香港喺宜居城市排行榜不斷下跌，就係因為空氣質素太差，莫講話旅客怕怕，駐外員工都耍手擰頭。呢個問題，由「氣候逃犯」曾爵士講到現屆政府，差不多十年仍然毫無寸進，高官與其藉口多多，不如檢討下自己好過。
話時話，賴天賴地早就成為根深柢固嘅官場文化。幾年前大球場舉行英超球隊邀請賽，結果因為場地太爛而淪為國際笑話，當時高官就係賴連場大雨；又例如高鐵工程延誤，港鐵方面亦曾經賴黑雨毀壞鑽挖機。當然喇，叫得做「賴錦樑」，賴皮功夫梗係有番咁上下。大家有眼見，佢老哥為官咁耐，幾乎掂親邊瓣衰邊瓣，特別係版權修訂條例鎩羽而歸，佢老哥仲好意思懶幽默咁引用武俠小說情節，叫市民認住班阻頭阻勢嘅政客，直頭唔知「醜」字點寫。
冇計喇，弱將手下無強兵，佢老闆施政一塌糊塗，搞到香港雞毛鴨血，民怨沸騰，照樣自我感覺良好，以為自己不知幾受歡迎，上「梁」不正下「樑」歪，有咩出奇吖！