中環出更：贏在起跑線劉燊濤帶B做Gym

BB仔點解要做Gym？Gary解釋，依家有幼兒外展中心畀BB學做Gym，透過爬吓隧道、打吓鞦韆等運動，訓練BB仔的柔軟度，促進肌肉嘅發展，等佢哋爬得快啲。講講吓，佢好頭痛咁話囝囝依家一歲半，佢幫個仔搵學校時，被問個仔學過乜嘢，話要學得夠多先畀報名表喎！唔知囝囝學過咁騎呢嘅BB Gym，有冇得加分？

孫秉樞唔使個孫幫手

香港鐘表業總會永遠名譽會長孫秉樞、兒子孫大為同孫仔孫智雄三代亦有到場。孫智雄係孫大為嘅細仔，啱啱讀完金融畢業，仲搵緊工。卓妮問孫秉樞想唔想個孫返公司幫手，佢笑笑口話，依家時勢唔好，想搵份掃地工都冇位，都係喺外面打工賺人哋錢好啲喎！真係識講笑。

轉頭見到華明行集團董事長高叔平同大仔香港鐘表業總會前主席高鼎國，為有份籌辦今屆鐘表展嘅細仔高偉國打氣。高叔平話今年鐘表展特別重要，因為依家鐘錶零售業跌得「唔清唔楚」，在咁低潮嘅時候，業界更加需要努力創商機。

孫秉樞（中）同孫大為（左）及孫智雄（右）三代齊齊撐場。

高叔平（中）同高鼎國（左）齊現身力撐高偉國（右）。（葉華英攝）

卓妮