綠色先鋒：水底清潔俠一次收集224磅垃圾
海中垃圾多不勝數，「愛‧珊瑚」組織日前舉行「水底清潔俠」活動，潛水員收集的垃圾多達二百二十四磅，而垃圾隨海漂流，可能造成極多生物誤食情況，影響生態環境。
文具眼鏡水靴乜都有
「海龜會食水母，但佢哋唔識分辨水母同垃圾膠袋，萬一食咗垃圾膠袋入肚，好彩就屙番出嚟，唔好彩就會留喺胃度，消化唔到而死。」該組織教育幹事Zoe指，海中垃圾最多的是廢棄魚網、遊船河時飲完的汽水罐、膠餐具、薯片包裝、膠樽、紙包飲品等，「螢光棒、文具、布料呢啲垃圾其實好奇怪，估計係來自沙灘嘅垃圾，隨風吹落海，再由魚網帶落海嘅其他地方，文具、眼鏡、車胎、水靴乜都有。」
而海中垃圾最主要的影響是「糾纏」，繩會扯死珊瑚和令動物受傷；大面積的垃圾如大帆布袋，則可能遮着珊瑚表面，阻礙生長，甚至死亡；部分生物可能隨垃圾漂浮到很遠的地方。
「而生物把垃圾食落肚，尤其係發泡膠，好容易碎開一粒粒，細魚食完，大魚又會食佢哋，就會去到成個食物鏈。」