政府早前成功喺立法會申請撥款，喺印尼首都雅加達開設經濟貿易辦事處，由於印尼屬回教國家，文化同香港有分別，加上近年不時有恐怖襲擊，據聞唔少公務員都唔係好想派駐去嗰度。不過，最近聽聞政府已覓得一位屬首長級第三級（D3）雅加達經貿辦主任人選，就係副行政署長杜彭慧儀將會平調。
杜彭慧儀○九年擔任沙田民政事務專員，處理過「五區公投」及一二年立法會選舉擔任選舉主任，同年底就升任副行政署長，佢個多星期後就會起行。另外，政制及內地事務局多個副秘書長即將調位，現任首長級第四級（D4）梁松泰喺立法會選舉後，就會升任首長級第六級（D6），負責回歸二十周年活動嘅籌備工作；而現任D3嘅副秘書長鄭鍾偉就升至D4級，出任食物及衞生局副秘書長。
至於政制局兩名副秘書長空缺，分別由首長級第三級（D3）嘅旅遊事務副專員羅淑佩（Rosanna），以及首長級第二級（D2）嘅財經事務及庫務局首席助理秘書長何珏珊（Joyce）升職擔任。兩位都係打得之人，最特別之處，係Rosanna及Joyce都曾經喺前政制事務局任職，Joyce更曾任前局長林瑞麟政務助理達五年，現時算係返回娘家。