中國人鍾意飲茶就人人都知，但好多人唔知嘅係，原來泡完嘅茶葉都好有用，經處理後既可防潮除臭，又可吸塵去油，更可當作枕芯，簡直係轉廢為能嘅最佳示範。之但係，呢啲殘茶葉落入不法商人手中就唔同玩法嘞，佢哋略作「美容」後再次當正品茶葉出售，消費者飲咗隨時得番半條人命都似。
係咁嘅，內地傳媒揭發廣州批發市場出售嘅廉價茶葉，其實係無良奸商收集食肆泡完剩落嘅二手茶葉，再混入香精、色素、激素「上妝增色」嘅劣質貨，由於每斤茶葉幾蚊雞人民幣已有交易，當地好多食肆都有採用。呢，港人北上最鍾意歎番一盅兩件，嗰啲唔收錢嘅「大眾茶」，咪多數係呢啲貨色囉，真係諗起都打冷震。
正如醫生話齋，二手茶葉混入各種有害化學物，長期飲用會影響人體腸胃及肝臟功能，而茶葉本身可能已經發霉，當中嘅黃麴霉素更可引致肝癌，你話唔驚就假咯。
可能有人唔信邪，以為唔返大陸就冇事，咁諗就大錯特錯嘞。正所謂奸商四圍有，毒物無疆界，尤其係香港幾乎所有日用品都依靠進口，邊有可能獨善其身喎。唔係靠嚇o架，本港大部分茶葉都係由內地輸入，而且唔少食肆都會北上廣州攞貨，二手茶葉流入本港一啲都唔出奇。再講吖，前排有環保團體抽查市面茶葉，結果發現全部含有殘餘農藥，最誇張嘅樣本含有十七種農藥咁多，證明有毒茶葉無處不在，香港一樣唔好得內地幾多嘅咋。
鬼咩，香港話就話有政府部門負責把關，實情係形同虛設，搞到黑心食品及飲品長驅直入，大鑊爆完一隻又一隻，淨係睇吓最近嗰單哮喘豬肉事件，明明漁護署已經驗出豬肉有問題，食環署一樣可以照畀問題豬肉流出市面，直頭靠害。
所以話啫，咪以為當局聲稱有抽查市面茶葉及茶包樣本，就可以大安旨意，事關官老爺不嬲胡混度日，鋪鋪都係傳媒踢爆或外地揭發，先至識得亡羊補牢。好似早前台灣爆出毒茶風暴咁吖，食安中心咪又係以為事不關己，高高掛起；又好似洋快餐過期肉事件吖，食安中心初頭矢口否認，關人個關，最後咪又係自打嘴巴。
講起就唏噓，如果唔係黑心商人為求賺錢不擇手段，連坑害同胞嘅陰騭嘢都做得出，中國又點會淪落到今時今日無物不毒、無食能安嘅地步吖。點都好喇，民以食為天，食以安為先，香港已經夠晒多事，唔該食安官僚醒醒定定做好把關工作，茶葉又好，食品又好，月餅又好，千祈咪臨近中秋佳節至嚟爆大鑊吖！