政情：荔園搞上市？邱達根：好遙遠
早前有指荔園主席邱達根（Duncan）將來或會考慮將荔園上市，Duncan澄清係有誤會，佢話依家只係想做好基礎，希望搞好品牌，強調上市係好遙遠嘅事，如果有咁嘅機會，當然係將來嘅事，但係依家完全係太早講呢件事，「將來有機會咪將來諗囉，但係依家完全冇諗呢樣嘢」。
荔園年底將會進軍廣州，Duncan話，為咗做好荔園品牌，預計未來一、兩年即使打入內地，都會自己做承辦方，並會同內地合作，唔會外判個名出去，咁先可以控制質量同定位，事關經營品牌需要好長時間。
至於下年會唔會喺香港再搞荔園呢？Duncan就話仲未諗，佢都想年年搞荔園，但係要考慮場地、檔期及租金等，靚嘅檔期通常都多人爭，真係土地問題呀。