政情：「估即辦」糟蹋皇都 前政助陳智遠鬧爆
仲記得陳智遠做食物及環境衞生局政治助理時，冇乜出嚟見人，亦好少出聲，但離開咗「熱廚房」後，成立咗團體「活現香港」，唔單止關注保育議題，個人仲變得非常火爆。佢日前就喺facebook寫咗多段文字，炮轟古物古蹟辦事處係「估即辦」，只係靠估就將皇都戲院定為最低級嘅三級歷史建築，完全係低估咗皇都戲院嘅歷史價值，仲話靠政府係無希望，所以決定自己搞導賞團保育皇都。
斥低估歷史價值
陳智遠日前上載咗張相，相中佢手持一個寫有皇都戲院四個大字嘅小巴牌，佢接受查詢時話個牌係專門為周日嘅導賞團製作，由於皇都以前係一個紅Van站，可以帶出當中嘅歷史意義。
講到保育皇都嘅問題，佢大鬧古蹟辦草率，斥古蹟辦以唔專業嘅方式，低估皇都戲院嘅歷史價值，更用無理嘅理由拒絕為皇都「升級平反」，指自己對古蹟辦完全無寄望。不過講到用乜嘢方式再抗爭，佢就反問唔通佔領皇都或者古蹟辦咩，都係透過教育同搵專家解決喇！