政情：建制派唔聽民記支笛玩集體決定
建制派以往嘅投票意向多數都好一致，尤其係喺關鍵大事上，不時都會收指示統一行動，但好不幸仍然發生「甩轆」，近年最經典莫過於政改一役集體甩轆，當中身為建制派「班長」嘅民建聯（民記）葉國謙備受指摘。近日流傳有建制派提出立法會換屆後，一改以往由民記發號施令，要求由建制派一齊開會集體決定，唔知此舉能唔能夠預防甩轆吖？抑或會演變成集體甩轆、齊齊孭鑊呢？
冀效法泛民飯盒會做法
隨着新一屆立法會議員即將選出，民記幾個資深議員都退落嚟，由年輕嘅第二梯隊接棒，但佢哋嘅實力受到質疑。早前流傳有地區人士嫌棄立法會區議會（第一）功能界別議員劉國勳資歷淺，唔夠牙力向政府爭資源，部分區議會「老將」計劃另闢渠道直接向政府最高層反映意見，原來呢件事只係第一波，建制派對於民記第二梯隊嘅不信任，蔓延到立法會層面。
民記嘅立法會議員，除咗進出口界黃定光，唔少人最多都只係由○八年開始做議員。有建制派認為，資深議員大有人在，根本民記後生一輩未夠地位壓場，難以說服其他建制派言聽計從。有聲音更加批評，以往民記試過無講清楚指示嘅來源，因此建制派開始醞釀唔再聽民記柯打辦事，希望來屆倣效泛民主派飯盒會做法，所有事情都要一齊商討，集體決定，每個黨派都有份，此舉先能令人服氣。
政改衰咗 改革聲音不絕
其實早於政改甩轆之後，已經有聲音要求改革建制派內部會議，例如有人曾經要求大家輪流做班長，但係後來就不了了之，至今又重提改革建制派會議。集體決定做法睇嚟好似能夠增加認受性，集體行動以防止甩轆。換句話講，萬一甩轆出事就個個有責任，即係集體孭飛，到時真係吟詩都吟唔甩，但又係咪各人所願呢？不過講到底，呢個建議能唔能夠落實，恐怕都係要等指示喇，諗太多都係徒然。