中環出更：漢奸黎急召老鴿選舉前謀攪局
立法會換屆選舉嚟緊周日投票，每當呢啲關鍵時刻，同泛民主派關係千絲萬縷嘅壹傳媒黎智英（漢奸黎）又再喺寓所密會攪局。被揭曾秘密收取漢奸黎捐款嘅民主黨（白鴿黨），該黨「老鴿」包括外號「李漢奸」嘅李柱銘、立法會議員「AV仁」何俊仁、單仲偕及前議員李永達，尋晚在漢奸黎寓所密會三小時，唔知係咪為選舉諗計攪局。漢奸黎搞亂香港已經神憎鬼厭，尋日又有三批人先後踩上門示威，漢奸黎永無寧日真係自作孽！
近月聲討漢奸黎行動停不了，但漢奸黎近個多月以來大部分時間都不在香港，疑似避風頭，直到立法會選舉臨近，佢日前才肯現身。不過，唔現身猶自可，一現身無耐就「急召」白鴿黨老鴿到其寓所「面聖」。李漢奸、AV仁、單仲偕及李永達尋晚六時許乘坐漢奸黎嘅七人車到達黎寓所，七人車拉上窗簾，神神秘秘好似唔想被人見到咁。四人逗留約三小時後，先一齊坐同一七人車離開，單仲偕上車時仲笑容滿面添！
四人現身 與黎密會三小時
AV仁同單仲偕今次選舉分別參選新界西及香港島直選，排在名單第二位幫後生抬轎，佢哋喺漢奸黎寓所密會三小時，莫非係收柯打準備喺選舉投票日前後展開特別行動？漢奸黎呢頭疑似密謀攪局，但嗰頭就後欄失火，事關尋日再有三批約八十人先後四次去到漢奸黎寓所外示威。早上十一時，有近四十人去到漢奸黎寓所外示威，佢哋手持印有「黑金黑心黎智英，賣國賣港賣國賊」嘅示威標語及印有漢奸黎頭像嘅紙牌，仲高叫「肥黎賣國，毒果害民」等口號抗議。
至中午十二時，又有二十多名身穿紅衣嘅示威人士到場，高舉「佔中亂港，不能容許」等橫額抗議。有示威人士直言，身穿紅衣係為咗表達對壹傳媒失實報道嘅憤怒。約十分鐘後，再有約二十人手持黃色氣球到場，佢哋當場踩爆氣球，以示不滿漢奸黎支持佔領行動。三批人士之後陸續離開，但到下午四時許，早上首批到場嘅示威人士又重返現場，逗留約一小時先肯離開，證明早上示威未鬧夠，難洩心頭之憤。
連月多番面對示威行動
近期針對漢奸黎嘅示威行動不絕，自六月十日起計，包括尋日行動在內，到漢奸黎寓所及將軍澳壹傳媒大樓外示威嘅行動最少達五十六次，當中自稱霸王國際集團員工及苦主嘅佔十次、正義聯盟佔三次，旅遊業界同其他人士則有四十三次。
新界西候選人名單仲包括黃潤達、高志輝、周永勤、鄭松泰、鄺官穩、田北辰、何君堯、梁志祥、郭家麒、黃浩銘、李卓人、黃俊傑、麥美娟、馮檢基、陳恒鑌、張慧晶、呂智恆、湯詠芝、朱凱迪。
而港島區候選人名單仲有黃梓謙、劉嘉鴻、葉劉淑儀、何秀蘭、張國鈞、詹培忠、鄭錦滿、羅冠聰、沈志超、王維基、徐子見、司馬文、陳淑莊、郭偉強。
卓妮