傳統有股市「五窮六絕七翻身」嘅講法，睇番近排恒指，唔單止五不窮六不絕，七、八月更加升勢凌厲，可惜股市熱火朝天反映唔到經濟實況，特別係消費市道低處未算低，想翻身都唔知要等到幾時。
呢，政府統計處日前公布，今年七月份零售業總銷貨值按年下跌百分之七點七，雖然跌幅略為收窄，但已經係連續第十七個月錄得跌幅。即係咁，今時今日百業蕭條，打工仔搵朝唔得晚，撳住荷包一啲都唔出奇。好似旺角一間專賣手機嘅商場咁，以往人頭湧湧，家陣死氣沉沉，有商戶大吐苦水，話生意額較舊年減少三分之二，嚟緊食粥食飯靠晒九月推出嘅新款手機，如果掀唔起搶購熱，估計成個場一半舖頭要摺埋，都咪話唔誇張。
嗱，本地人荷包乾硬化，以往仲有內地呢條大水喉射住，近月訪港旅客人數止跌微升，照計可以幫補吓，但正如有業界人士話齋，以往訪港旅客多數嚟自內地一線城市，個個財大氣粗，唔貴唔豪唔買，依家就轉為二、三線城市，消費力高極有限，咁就難怪旅客數字上升，消費額反而好似食咗瀉藥咁跌跌不休喇。難為有啲人開口埋口吸引高質素旅客，家陣財主就冇嘞，去藥房超市掃貨嘅水客就大把！
又難怪嘅，香港一直以嚟被譽為購物天堂，皆因實行零關稅，但近年租金等成本不斷飛升，早就冇價廉物美呢支歌仔唱，好多奢侈品仲貴過歐美日韓，精明消費者自然識得揀，加上內地調低進口關稅，香港競爭優勢更加蕩然無存，內地豪客斷估唔會山長水遠落嚟香港畀人歧視，貼錢買難受啩！
可能有人話，內地家陣反貪反到（興）合合，加上消費模式轉變，土豪都少咗，其實呢啲只係自我安慰。事實擺在眼前，內地豪客每年出遊人數節節上升，早就成為唔少國家心目中嘅財神，好似某啲內地企業咁，年年免費請幾千員工外遊，足迹遍及法國、西班牙等，淨係旅費都講緊億億聲港紙，連當地領導都不敢怠慢，親自接見。一句講晒，唔係內地冇土豪，而係香港冇本事賺佢哋錢。本來呢，做唔到土豪生意都唔緊要，其他客人賓至如歸，生意一樣長做長有，弊在香港地消費陷阱遍地，加上中港矛盾惡化，遲早連內地二、三線城市遊客都嚇走埋，到時盞食穀種嘅咋！
最好笑係，香港搞到今日死城咁，嗰班趕客唯恐不及嘅激進分子仲唔知死，成日話「守護我城」、「自己香港自己救」，喂，唔該唔好大隻講，真金白銀大手掃貨仲實際喇！