政情：深港通就到 張德熙籲冷靜
「深港通」預計最快十一月開通，金銀業貿易場監事長張德熙話，對於港人以深港通投資內地股票有保留，因為受內地證監監管，認為有少許模糊，相反內地投資者以深港通投資香港股票就受到保障，亦令香港資本市場更蓬勃。
小股民留意首數月市況
對於深港通不設額度，張德熙就相信最初熱錢會較多，小投資者初期要冷靜，因為不少內地資金會希望出來投資，可能造成一窩蜂衝擊，影響或會較大，本港投資者要特別注意最初幾個月嘅市場情況。
佢又認為，本港投資者長遠可以留意國企，因為在港上市嘅國企一直炒落後，建議這段期間不妨考慮有關國家金融嘅股票，例如銀行股，呢段時間可以逐步吸納。
至於佢自己就睇好工商銀行，估計工行應該喺九至十元先屬正常，所以依家好抵買，佢亦已持有工行股票約十年。張德熙嘅投資建議只作參考，大家要自行評估風險喇。