政情：「施」家嚴令 過濾資訊 仔女玩電腦要陪同
科技發達，加上家長工作咁繁忙，唔少小朋友細細個就自己玩電腦，但全國青聯副主席施榮忻（Jaime）就話，唔會畀最細嗰兩個小朋友單獨玩電腦，最多都只會陪住佢哋睇吓手機，睇嚟監管都好嚴格喎！
鼓勵小朋友執筆寫字
Jaime有三個囝囡，分別係十三歲、六歲及四歲，佢話十三歲大女就有齊電腦同手機，但係細嗰兩個小朋友就唔會有電腦，佢認為唔可以太早畀小朋友單獨接觸電子產品，因為網上有好多嘢都要過濾咗，才適合畀小朋友睇，一定要監管住佢哋玩，到大啲就要畀信任佢同空間佢哋。
至於到幾多歲才適合玩電腦呢？Jaime就話，冇一條界線嘅，覺得要用時，自然就應該要畀佢用，學校都會同父母講有需要，而佢依家經常鼓勵小朋友寫多啲字、用心算計多啲數，咁樣對小朋友嘅思維同成長才有幫助。