中環出更：禪修頓悟 龐愛蘭唔選立會
四年前競逐立法會新界東議席失利嘅沙田區議員龐愛蘭（Scarlett），多年來一直積極備戰，試圖捲土重來，期間更多次獲某政黨招手，點知最終唔見佢報名參選。早前我哋喺一個活動見到Scarlett，佢話原本一切確係如箭在弦，但立法會嘅「拉布」情況愈來愈嚴重，如果佢當選，可能都係由朝坐到晚點票，乜都做唔到。
議會拉布 令人卻步
Scarlett話對於參選好掙扎，人生未試過咁難抉擇，後來去咗馬來西亞禪修五日後，個心先至清晰啲，最終決定唔選。睇嚟拉布議員真係將立法會變得神憎鬼厭嘞！
講起禪修，原來都有段緣。話說Scarlett冇宗教信仰，咁啱喺佢好煩惱嘅關鍵時刻，遇到一位啱啱喺慈山寺跟隨馬來西亞師傅禪修完嘅朋友，Scarlett覺得自己都好需要靜一靜，於是就請朋友搭路，專程飛去馬來西亞搵嗰位師傅。期間自己諗嘢、睇書，心緒漸清，頓悟咗唔做議員可能做到更多實事嘅道理。
卓妮