中環出更：香港鐘表展 智能傳統結晶
全球最大嘅香港鐘表展下周二在灣仔會展登場，一眾鐘錶界翹楚尋日齊齊現身宣傳騷。市道麻麻，業界更加要絞盡腦汁諗吓新意，今屆亮點係新設智能手錶專區，事關智能錶發展潛力大。不過，自創智能錶品牌嘅飛先董事長兼香港青年工業家青委前主席梁嘉威（Wayne）就話，今年智能錶嘅銷情跟隨大市下跌，而且競爭好大，隨着非接觸支付模式興起，佢反而睇好將智能融入鐘錶及珠寶首飾嘅前景。
Wayne做智能錶已經七年，佢話最吃香係前兩年，當時無論係幫生產商代工或自創品牌都好好做，但依家再谷智能錶品牌已經好吃力，因為鬥唔過大品牌。故此今次展覽佢將重心放喺擁有專利嘅手錶機芯托，一於同各品牌鐘錶百搭創雙贏。香港鐘表業總會主席黃麗嫦都話智能錶可以同傳統鐘錶嘅精密科技結合，合作分多一杯羹。
董必政設計一鳴驚人
尋日另一重頭戲係鐘錶設計比賽頒獎禮，以便為業界發掘創作人才。今年共有一百五十份參賽作品，公開組冠軍由「翡翠皇后」董吳玲玲嘅細仔董必政（Donald）及香港表廠商會會董梁瀚譽取得。原來Donald已經去瑞士學鐘錶設計及製造三、四年，目的是做一隻高價珠寶腕錶，預計年底可以完成。
秘密練兵多年，Donald一時技癢，遂夥拍梁瀚譽小試牛刀，結果一鳴驚人。佢今次參賽刻意隱姓埋名，連媽媽都被蒙在鼓裏添！
卓妮