50載咖啡廠不捨聲中落幕
【專案組報道】「全部售罄喇，唔好意思！」自一九六六年起經營的咖啡廠，隨一眾街坊不捨聲中落幕。店主人被稱「肥佬」的鄧國俊售賣咖啡紅茶數十年，每日營營役役，幾乎沒有自己的興趣及生活，不過他毫不後悔，皆因他在此譜出了一段段人情故事。
「功成身退，回鄉耕田」，鄧親自題字貼在櫥窗，當是向街坊交代告別。六十五歲的鄧國俊，其位於紅磡的咖啡廠主要經營咖啡原材料加工，接手父親的咖啡生意逾卅載，他憶述自十五歲起就到店內幫忙，打掃、炒咖啡豆、磨豆、配豆、包裝、送貨都一手包辦。
店主與妻靠咖啡結緣
鄧坦言，最初都只是為了「搵食」，但後來就成為了興趣，「呢行好多人唔飲咖啡，我算飲得多。」多年來，店舖一直是「上居下舖」，與咖啡為伴，面對結業，「都冇咩唔捨得，人生就係咁，唔同時間有唔同嘅目標，以前後面有間戲院，我都未去睇過，依家要補番。」然而當看到居住了多年的家居陳設，即將遷出的鄧亦語帶傷感，不禁哽咽。
與鄧如何認識？鄧太稱「真係好似拍劇咁，我喺快餐店打工，佢送咖啡粉嚟，咁咪成日見到，每次見都覺得呢個男仔幾好。」當時雙方都不敢做主動，僅默默關注對方，後來才正式「過電」。「嗰時拍拖嘅節目就係送貨，坐天星小輪周圍去，工作之餘又唔使點使錢，都好浪漫嘅，但講到底只係苦中作樂。」二人相視而笑，鄧太留下一句：「我哋呢啲叫細水長流。」