話說去年政改失敗，建制派臨陣甩轆，搞出「等埋發叔」嘅醜陋一幕。點不知香港基建樣樣落後於人，就講香港、澳門、廣東三方合作嘅港珠澳大橋吖，人哋一帆風順，香港就好事多磨，結果又搞出「等埋香港」嘅笑話，都咪話唔瘀皮。
係咁嘅，港珠澳大橋香港段工程一波多折，搞到完工日期一拖再拖，到底明年底係咪可以通車，冇人敢寫包單。反觀內地段及澳門段就進展順利，前者主體工程已經合龍，如期通車實食冇黐牙；後者亦按部就班，今年第三季將開展口岸管理區嘅上蓋工程，整體工程有望與內地同步完成，效率點止高香港一班咁簡單吖。
早就有人擔心，香港段工程慢人幾拍，隨時拖內地及澳門後腿，萬一大橋淪為半橋，世界奇迹變成世界笑話，咁就名副其實佗衰家嘞。可能中央都知香港唔得掂啩，國家發改委日前向香港大派定心丸，強調港珠澳大橋一定同步通車，點都會等埋香港喎。講係咁講啦，但要兔仔等烏龜喎，唔嬲就假咯。正如「東方報業民意調查」嘅受訪者話齋，「等埋香港」損害內地及澳門經濟利益，亦損害香港國際形象，反映港府冇做好監管，管治能力弱過弱雞，真係一啲都冇講錯o架。
正所謂打鼓聽聲，說話聽音，發改委官員雖然為香港說盡好話，指大橋工程技術難度高，有阻滯在所難免，但又話鋒一轉，要求三方共同努力推動工程，盡快投入發揮效益。弦外之音，咪即係話香港唔夠努力，阻住地球轉囉。身為香港人，你話係咪羞愧到無地自容吖？過去香港事事領先，唔止係內地嘅示範窗口，仲係澳門嘅學習榜樣，點知家陣風水輪流轉，香港樣樣都落後過人，早就被拋在後頭。唔怪得大部分受訪者都話，大橋嘅遭遇正正係香港由盛轉衰嘅縮影喇。
冇計嘞，香港回歸十九年，亂足十九年，成個社會沉迷政治鬥爭，經濟民生無人關心，加上港府弱勢無能，政客又唯恐天下不亂，競爭力點會唔跌跌不休吖。港珠澳大橋只係冰山一角咋，另一國家級跨境基建廣深港高鐵工程，香港段同樣落成無期。事實擺在眼前，香港呢一制問題多多，唔止及唔上一國，就連澳門嗰一制亦不如，想唔信香港冇運行都唔得喇。
最可笑嘅係，部分香港人仲未知衰，仲自我感覺良好，擺出高高在上嘅姿態不特止，仲話想學人搞港獨喎。香港已經係七國咁亂，再畀港獨分子搞一搞，隨時淪為壓倒香港嘅最後一根毒草，到時就算起好大橋，都係得物無所用嘅咋。