政情：貪湯落鑊邊緣 阿哥死撐都冇用

貪湯喺一三年被爆出外訪、不當酬酢、饋贈同收受禮物風波，轟動全城，仲打爛廉署嘅招牌，令到市民對廉署嘅信心急速下滑，就連廉署亦因應事件而修訂《公共機構成員行為守則範本》，收緊收受禮物嘅限制，亦就誇大報銷出差費、利用職務之便為退休後鋪後路等涉行為失當同利益衝突等行為作出清晰指引，咁都係要杜絕第二個貪湯嘅出現。

「唔睇小節 請食牛腩冇問題」

香港過往以廉潔見稱，就畀貪湯一嘢打沉，然而佢大佬湯顯森尋日死撐細佬由頭到尾都冇做錯事。被問到細佬係咪應該更加小心啲，佢就話呢個世界如果個個肯為社會做嘢都小心嘅呢，冇人肯做嘢o架啦，覺得人要睇大體，唔係睇小節，個個都有小節被人睇到，「好坦白講，請人食牛腩有咩問題啫？（大家關注係因為嗰個係公帑吖嘛）但好小事吖嘛，絕對唔係話二百萬元。」

被問到細佬任內買茅台呢啲貴酒，可能會比較敏感，湯顯森就話：「好心啦，飲茅台，我大膽啲講，你記住你唔可以我同你咁嚟去睇，你要睇一個higher level （較高層次），好似特首話去到酒店入住總統套房咁，我覺得有道理喎，你依家係代表個國家吖嘛」。再追問喺內地亦有「打貪」，厲行節約公費，宴會中亦少買烈酒，佢就認為同意打貪係啱，但又指唔可以今日嘅標準去決定當時嘅社會標準。

廉署早修訂守則撥亂反正

湯顯森話貪湯冇做錯嘅話，點解廉署要修訂守則吖，咪因為要撥亂反正囉！仲有，湯顯森自己都講出重點，貪湯用嘅正正係佢口中所講嘅公帑，公帑係納稅人嘅錢，一個崩都要好小心去用。再講，佢當時係廉政專員，係主力打貪部門嘅阿頭，正所謂上樑不正下樑歪，廉署「打貪」變咗「吸貪」，香港就玩完喇！

講到尾，湯顯森依家幫細佬講乜都冇用，冇犯法係咪等於冇做錯，輿論點睇，已經相當明顯，貪湯喺法規上，係咪真係可以甩身，就等吓公務員事務局點決定嘞！