中環出更：梁敬國「死魚」喻創意：最緊要有Heart
由創意創業會（創意會）主辦嘅「創」＋「造」配對計劃早前喺觀塘一座活化工廈舉行，數十名本地設計師即場展示琳琅滿目嘅創意產品。商務及經濟發展局副局長梁敬國（Godfrey）都去撐場，事關呢個計劃獲得該局旗下嘅「創意香港」贊助。Godfrey致詞時勉勵設計師們，做嘢最緊要有Heart，否則就同死魚冇乜分別。佢突然「靈機一動」話，可以考慮整一個「死魚系列」喎！創意同無厘頭只係一線之差，睇嚟Godfrey如果唔做官，都可以靠創意搵食。
呢個配對計劃已踏入第六年，今屆首次以市集形式，為本地設計師提供與公眾互動嘅商貿平台。免費借出場地嘅「舖王」鄧成波細仔鄧耀昇（Stan）都有到場，佢亦係創意會成員，難怪對本地創意工業特別支持。
鄧耀昇「實地」支持創意工業
Stan話佢哋旗下有十幾座活化工廈，由於租金介乎傳統工廈及寫字樓之間，唔少創意行業確實因此而得到發展空間。
同場仲有創意會副會長兼百本醫護主席關志康（Jacky），佢間公司旗下登記嘅醫護人員逾一萬五千人，近年公立醫院不時爆護士荒，唔通護士都「逃」到佢旗下，寧願接柯打返工？佢就話時代改變咗，依家打工仔追求工作同生活平衡，唔肯打死一份工，所以護士荒問題可能變成常態。佢哋除咗幫市民搵醫護人員上門之外，唔少私家同公立醫院都同佢要人添！
卓妮