話咁快又到中秋節，對於愛美一族嚟講，雙黃蓮蓉、冰皮、奶皇……各式月餅誘惑當前，之後減磅都咪話唔傷腦筋。不過計功夫茶話齋，磅可以慢慢減，萬一唔好彩病從口入，咁就掃興嘞！
呢嗱，話口未完又嚟嘞。海關日前接獲舉報，掃蕩上水兩間店舖，檢獲二十盒冒牌雙黃白蓮蓉月餅，無論罐身、字體、標籤、盒內膠刀、月餅膠底盤花紋以至月餅色澤等，同真身都有好大出入，而價錢足足平三成幾。所以話，光棍佬教仔，便宜莫貪，幾時都冇講錯。
即係咁，今次呢批月餅只係A貨，無發現重金屬等有害物質，消費者總算執番身彩，否則嘅話，中秋節未到就要經歷「中秋劫」，咁就大吉利是。唔係嚇大家o架，早幾日文錦渡檢驗檢疫部門至銷毀一批港產月餅，菌落總數超出國家標準五十幾倍，據講嚴重嘅可導致痢疾等腸道疾病，都咪話唔得人驚。
諗落真係唔知好嬲定好笑，內地客最興來港「爆買」，日用品唔在講，連月餅都唔例外，有人一次過掃五十盒，有人索性成車成車運番上去。不過如果佢哋以為「香港製造」一定係品質保證，咁就大錯特錯嘞。事關港產月餅被指有問題，非自今年始，舊年中秋期間內地部門禁止攜帶港產月餅入境，原因係蛋黃、乾果等餡料可能傳播禽流感及口蹄病。最離譜嘅係，當時港府高官唔係第一時間亡羊補牢，堵塞漏洞，而係強調內地有關措施係針對水貨客，企圖大事化小，小事化了，你話係咪不負責任吖！
有人話，兩岸仲未統一，但黑心食品早已「一國一制」，蘇丹紅蛋、孔雀石綠魚等交叉感染，查實香港都係五十步笑百步嘅咋。好似年前坑渠油風波咁吖，食安官僚開頭滋油淡定，以為事不關己，最後至發現香港竟然係源頭之一；又試過有煙三文魚柳被李斯特菌污染，港府後知後覺，等到澳門當局提供線報至做嘢都算嘞，原來呢批問題魚柳係喺香港加工，官老爺咁都可以懵然不知，旨意佢哋為市民把關，蚊都瞓蛇都死。
官老爺胡混度日，把關不力，咁就難怪食安危機長爆長有，鑊鑊新鮮鑊鑊甘。最慘係港府一本通書睇到老，食安條例完全冇與時俱進，針對食物含重金屬嘅法例，幾十年如一日，仲寬鬆過部分第三世界國家，鉛水危機後港府仲唔知驚，修例拖得就拖，急驚風遇着慢郎中，有乜法子唔死得人多！
講到呢度，功夫茶想預祝各位中秋佳節「闔家團團圓圓」。千祈咪嫌老土，今時今日市民食得安心都係奢望，「團團圓圓」已經好幸福咯！