曾經講過體育界冇任何經濟價值，又一度計劃將啟德體育城土地改為興建住宅嘅政府，近期因為巴西奧運就「忽然體育」，又話要向今屆奧運獎牌數目增加嘅英國借鏡體育發展政策。巴西奧運香港代表團團長、港協暨奧委會副秘書長霍啟剛就話，奧運令本港市民對體育嘅熱情「四年一熱」，而政府對體育界嘅支持亦都唔足夠，佢就希望政府可以長期資助唔同體育項目嘅發展，唔好只以四年一屆嘅奧運為目標喎。連啟剛都話體育四年先熱一次，唔好講話攞獎牌嘞，最終培訓到幾多精英運動員，真係不敢想像。
