政情：吳永嘉獻計 「上車」減怨氣
香港樓價漲不停，政府實施多項樓市辣招亦難阻升勢。自動當選嘅候任立法會工業界（第二）議員吳永嘉（Jimmy）似乎唔怕刺激樓價嘅風險，建議政府重推首次置業貸款協助年輕人「上車」，聲言此舉可以減低社會怨氣，年輕人對前景充滿希望，港獨問題就會迎刃而解。
身兼中華廠商聯合會副會長嘅Jimmy尋日喺電台錄音節目中話，港獨緣於年輕人對未來感到絕望，如果想重建年輕人對社會嘅信心，協助佢哋上車係其中一個辦法。咁要點樣協助呢？佢建議，政府重推首次置業貸款，又或者同銀行合作，協助首置嘅年輕人申請比較高成數嘅按揭，從而減輕首期嘅壓力，「如果三十多萬元上到車，怨氣就會少啲」。
不過，根據過去經驗，首次置業貸款會刺激需求，變相推高樓價，加上高按揭成數，一但爆煲，隨時再次引發「負資產」危機。再者，年輕人有層樓就會對前景充滿希望？