政情：梁天琦「收山」 足球賽無得踢
國家隊精英運動員尋日展開訪港之旅，但一班本土派就喺深水埗大搞「本土足球邀請賽」。本土民主前線（本民前）亦有派隊參賽，但發言人梁天琦竟只做觀眾。佢解釋，兩年前仲讀緊大學時，因為做運動而導致右腳斷腳，前後經歷咗三次手術，所以已經「踢唔番（波）」，直言感到可惜。
指政治體育難劃清界線
今屆巴西里約奧運，港人對國家隊嘅關注都比以往冷淡，梁天琦認為同歸屬感有關，即使中國贏得多個金牌亦都一樣，所以對金牌運動員訪港唔會有任何感覺和反應。佢又話，政治已內化於體育內，好似西甲嘅皇家馬德里同巴塞隆拿都有國仇家恨牽涉在內，所以無可能「體育還體育，政治還政治」。
沙田區議員陳國強亦有觀賽，佢話曾經支持過國家隊，尤其係「體操王子」李寧，但隨着中港隔膜日深，加上感覺中國隊嘅體育精神不足，認為現時唔值得觀看。中大學生會會長周竪峰就有落場比賽，但佢嗰隊就包尾，本民前得第三，冠軍則落入調理農務蘭花系手中。