政情：TSA勢復活 教局拆吳拆得掂？
教育局近年一直位處政治風眼，由局長吳克儉（吳得掂）上任至今，歷經國民教育科風波，最近又要面對港獨入侵校園等事宜，疲於奔命。此外，當局仲要面對修改小三全港性系統評估（TSA）呢件爭議事件，局方將於今年十一月公布修訂版小三TSA報告，有政界中人分析，預計報告顯示學生成績不會差，到時結論係有機會建議再次推行小三TSA，意味一眾莘莘學子將要繼續補充練習無間做！
自TSA落實以來，家長及學界均指唔少學校為應付TSA而操練學生，做補充練習冇時停，加上問題愈問愈深，令TSA異化。舊年下半年，有家長群組開始爭取取消小三TSA，當時立法會更召開馬拉松式公聽會，有小三學生會上發言話，TSA令佢哋冇時間玩耍，多個政黨亦表明支持取消小三TSA。局方最後惟有成立檢討TSA委員會，今年邀請一成小學試考修訂版小三TSA，修改內容包括減少篇章、題目數量，亦刪去個別被指太艱深嘅題目。
修訂版邀高水平校參與 差極有譜
有政界中人分析，由於局方只係邀請五十間學校參加修訂版小三TSA，而接受邀請嘅學校水平差極有限，所以十一月公布嘅報告，相信唔會太差，相信局方屆時檢視報告後，或會繼續每年推行小三TSA。或者到時學生繼續要高唱「明明我已奮力無間補充喪做，我不玩也為活得好，猛喝雞精，提神醒腦，就算腎已虧損，仍然要做！」
究竟重推小三TSA，會唔會惹來家長及教師反彈呢？一旦出現反彈，局方又點應對呢？政界中人分析，當初都冇諗到家長會接受教育局提出試考修訂版小三TSA，所以現階段談論局方係咪會讓步真係言之尚早，但就分析出多個讓步可能性。例如隔年考小三TSA，操練文化只會隔年發生；又如果只揀一成學生考試，要了解學生應對某類題目的分析就難以做到。究竟教育局能唔能夠安全拆彈，就要睇吳得掂造化喇！