中環出更：陳振英入立會 竟向星爺取經
正所謂「名師出高徒」，有個好師傅的確係贏在起跑線。自動當選嘅立法會金融界議員陳振英自爆，曾經搵過現任金融界議員吳亮星（星爺）請教立法會嘅經驗，當正星爺係師傅。陳振英同星爺都喺中國銀行出身，曾經共事過，但兩人當時未有深入認識，只係點頭之交。不過，星爺放棄連任議席，由陳振英喺無對手下自動當選，接棒味甚濃。
吳亮星政績惹爭議
陳振英尋日在電台節目自爆，當截止提名期一完結，確定自己當選後，就立刻向星爺取經，問吓立法會會議運作及規矩等，當正星爺係師傅。肯放低身段拜師當然抵讚，但係星爺任內擔任財務委員會主席期間爭議不斷，尤其係處理新界東北發展計劃前期撥款，更導致立法會被包圍。
另外，政改方案甩轆一役，星爺亦傳被有關方面「照肺」問責，如此「政績」似乎同好老師難以掛鈎喎。究竟係陳振英誤拜庸師，抑或係睇中星爺錯誤多多，可以當做反面教材呢？
卓妮