中環出更：「登陸」話當年 沈運龍諗起胸圍
香港中華廠商聯合會常董兼仁愛堂總理沈運龍（Aaron）早前開「登陸」派對慶祝六十歲生日，數百名政商界好友都去送上祝福。Aaron回憶兒時窮困生活點滴時話，佢細個住喺青山道工廠區，媽媽為幫補家計，經常以驚人嘅體力一次過擔千幾個胸圍返屋企剪線頭，Aaron梗係有份幫手啦。佢仲搞笑話，若有呢類健力士紀錄，佢絕對係全世界「接觸最多胸圍的少男」喎，引起賓客哄堂大笑。
Aaron講起成長過程時笑中帶淚，仲細數去中東闖蕩時幾次死過翻生，同Aaron相識幾十年嘅「電鑽大王」香港工業總會名譽會長鍾志平，即時向同場嘅「一帶一路」專員蔡瑩璧推介話，帶商界去開發一帶一路沿線國家商機時，就正正需要Aaron呢種打不死嘅精神喇！
蔡瑩璧重返職場唔慣早起
上任未夠一個月嘅蔡瑩璧難得出現公開場合，好多人都上前同佢寒暄一番，包括香港機場管理局行政總裁林天福、香港品牌發展局主席黃家和等人。蔡瑩璧笑稱，上任後最唔慣係要早起身，皆因佢過咗幾年退休生活，得閒就遊埠、做吓義工，生活步伐好悠閒。不過，呢份工作好有意義，值得佢暫停歎世界，就算無糧出都一樣咁開心喎。
當晚到賀賓客多到爆，Aaron太太Alice及三個子女都幫手招呼。其中年僅十三歲嘅細女Ebelle遺傳到爸爸嘅藝術細胞，繪畫好叻，當晚仲捐出兩幅油畫拍賣添，籌到善款全數捐畀仁愛堂，實行做善事為爸爸賀壽。
卓妮