日前看到山東青島海關破獲走私海鮮案，涉款二點三億元人民幣，部分海鮮更產自涉被核輻射污染嘅日本福島海域。眾所周知，福島事故發生於二○一一年，地震海嘯引發福島核電廠冷卻系統被破壞，導致反應堆爆炸，大量放射性物質外洩，至今核污水仍以每天四百噸的速度排入海洋，也不知道如何影響就近的海洋生態。中國政府自二○一一年後已禁止福島海產進口，之不過，因有關部門把關不嚴，不法商人利之所在，竟然改標籤產地，來個偷龍轉鳳，將海鮮換到越南，再從陸路進口中國，轉銷北京、廣州等地。
據悉兩年來走私的海鮮已有五千多噸。阿哥，當你「欲食海上鮮，莫惜腰間錢」時，以前或許怕是中雪卡毒素，面部舌頭麻痹，皮膚痕癢肚瀉，過後未必會死人，或食豉汁蒸大鱔時遇上微量孔雀石綠，都未必就致癌嘅；之不過輻射海鮮，其毒確甚堪憂。有論者話香港的入境檢查比較嚴謹，都需要衞生證明。唉！老朽就唔係咁樂觀喇！哮喘豬把關程序都出錯，又話中途畀人落毒陷害，死豬無言的含怨，要出動到警方重案組調查，認真大陣仗，到頭來恐怕又係不了了之。跟住，消委會又調查指出市面上四十款常見豉油，竟有十一款有致癌物，老朽當年家貧，常豉油撈飯又一餐，好彩當年冇咁多污染嘅，食物亦冇咁多冇厘頭致癌物。
嗱！話口未完，冇神經政府又把關不嚴，又追唔上時代，夏日炎炎又不為冷凍食品把關，本報在市面購買六個沙冰飲品，委託浸大生物學系檢驗含菌量，竟然有兩個樣本嘅李斯特菌量超出台灣衞生標準嘅一點八倍和一點三倍。阿哥，即係其材料有機會受到糞便污染。唉，冇神經政府好應該反省下，唔係個個膽大兼百毒不侵o架，在沒有加強執法及為凍飲訂立總細菌含量標準時，攝氏三十五度，老朽依然要飲阿姐嘅熱咖啡！