政府推出咗唔少減廢措施，好似減少街上垃圾箱，又將傳統垃圾箱換成「細口仔」垃圾箱，但成效似乎不大，仲有人直接將垃圾棄置在垃圾箱旁邊，搞到烏煙瘴氣。不過，政府好似無吸取教訓，漁農自然護理署轄下嘅郊野公園及海岸公園委員會又有新搞作，話下月起要將目前郊野公園嘅垃圾箱，由五百多個勁減一半，鼓勵市民「自己垃圾自己帶走」，用行動保護環境。雖然話計劃已經喺五個試點試行，但一次過減咁多垃圾箱，會唔會好似「細口仔」垃圾箱咁弄巧反拙，最後搞到郊野公園變垃圾崗呢？
